وفق منهــــــج عشــــــــتار

عشتورة قصتج قصة بالعباس!
مبين عليج هواية تفتهمين وخوش حجي تحجين!
بس ياخالة هم عله كيفج ويانة احنة هم خطية.

احنة صدك حمير لان مثل ماتعرفين احنة جيل القايد ابوعداي الي ماعلمنه غير شلون نردح ونصّرخ( بالروح بالدم نفديك ياصدام )وكالولنة بالمدرسة الي يحفظ هاي الجملة ينجح بكل الامتحانات ويصير دكتور هم بعد ومن يكبر انطلعة بالتلفزيون وانخلي يكتب بجريدة الثورة.

بس خالة والله احنة ماردنة انصير زمايل ونلبس البيرية ونكضي عمرنة كله لازمين البندقيةونحارب علمود ابن الك.....يظل ياكل موز وفراولة واحنة ناكل بس خ..... لهل السبب تعبنة هواية واشتغلنة على انفسنه ورحنة نقرا مجلتي والمزمار حتى انكوم نفتهم شوي.

ياخالة يابعد عيني احنه شلازم ايصير بينه بعد حتى نفتهم الفلم.....يعني لازم كلنة انصير مقاومة وانموت حتى خالتنا ترفع راسهه وتحفظ كرامتهه الي تجي بمقاسات خرابيط نويصر المصري وصديم العراقي؟!

ولج خالة احنة تعبنة ومابقة بينة حيل لهل السوالف....اهلنة كلهم ماتوا .....الي بالحرب والي مات بضيافة البابا صدام والي كتله السرطان وامراض الاطبة مايعرفون الهه اسم.

بروح ابوج خالة عوفينة انريد انعيش حتى لو بذل ترة النشيد الوطني كل الوادم حفظته بالكوة ومّلت مّنه.

احنة مو غير عن الناس لااحسن منهم ولا هم احسن منه.
شوفي شصار باليابان والمانيا تحت الاحتلال وبوجود القواعد العسكرية الامريكية.
وليش انروح بعيد هسه ذولاك الاوادم اكيد غير عنّه.
روحي شوفي الفلسطيني الي عايش تحت الاحتلال الاسرائيلي شلون وضعة وشوفي اخوه الي تحكمة السلطة الفلسطينية شلون حاله وحتة هذا العاوي الداوي هم حاله احسن من حالنة بايام قايد المسيرة الفطير.

انزين مو هاي يمنة دول الخليج الاحتلال بيهه كاعد فوك تاج الملك على مر الزمن كبل ماتدخل القوات الامريكية دارهم حتة....شوفي الله شلون راضي عليهم وسوالفج الطيبات وسوالف زلمة العوجة لوين وصلتنة .
وبعدين خلينة من سوالف باقي الناس شتكولين عن العراق ايام الملكية تحت احتلال الانكليز مو كل الناس اتكول جان العراق دولة تمشي صح ولمن اجانة العرفاء ونواب الضباط طاح حظنة.

وبعدين يابعد شيبي شنوسوالف الاغتصاب هاي الي اتسولفين عليهه؟
بشرفج انتي جنتي ويانه ذيج الايام لو لا له؟
شبل الجلب عداي ياخالة بيوم باللجنة الاولمبية اغتصب من العراقيات بكدمااغتصبت كل القوات الامريكية بكل مكان بالعالم.
وبعدين احنة العراقيين متعلمين على الاغتصاب زلم ونسوان.
اشاوس ابو عداي ماقصروا بمعتقلاتهم....كاموا باللازم وزيادة....جا انتي ماعرفتي ليش يسمون صديّم ابو الكرامة لان الرجّال سحب كرامة كل العراقيين و(بال) عليهه.


وبعدين كلبتي على مدينة الصدر والمهندسين والاطباء الي يطلعون منهه مكرمة القايد!
عمو انتي رايحة لخرابة الصدر هاي.....كل خمسين نفر يعيشون بخرابة بكد حمامنة بالبيت والخوان ونسوانهم وجهالهم كلهم بغرفة وحدةوبعد الساعة عشرة تبدي مباريات الدوري والجهال يصفكون والبابا صدام مشغول بالمدفع العملاق وبناء القصور لمناضلات عداي.

ياخالة لاتصيرين كلش بعيدة عنّه.
محد راضي بزبالة اليوم.
لاجن نجاسة اليوم ماتكدر تمحي نجاسة البارحة.
صديم ياخالة موبس دمر العراق وحرك مستقبلنة.
صديم دمر قيمنة الي نعتز بيهه وحطّم اخلاقنه.
خله الابو يبيع ابنه للفرقة الحزبية علمود يستلم البرازيلي يبيعهه ويتزوج بفلوسهه طفلة.
خله الرجال يبيع بنته بسوريا والخليج علمود يعيش باقي اولادة.
خله العراقي بكل دولة عربية جايفة يمشي خايف ومذلول.

واخر حجاية اريد اكولهه الزمن اتغير ياعشتار وقصص( عونج ياكاع) لعبت روحنه منهه صديم ولى وعهده السقيم انقضى وعهد حثالات اليوم سيمضي ايضا ومن يريد ان يلعب ادوار الشعارات ومقاومة الدولارات عليه ان يحث ابناءه على ذلك ليدفعوا ثمن هذا اللغط فلم يبقى فينا دماء لنتبرع بها في مثل هكذا مشاريع حنقبازية.

samialrubaiee@msn.com